Námsver er regnhlífarhugtak sem nær yfir öll þau úrræði og alla þá þjónustu sem Álftamýrarskóli býr yfir til að að koma á móts við þá nemendur sem á einhvern hátt eiga í erfiðleikum með að stunda skólagönguna á sömu forsendum og meginþorri nemendahópsins.

Úrræði námsvers ná til nemenda úr öllum árgöngum skólans og teygja sig inn í allt skólastarfið hvort sem litið er til einstakra námsgreina  eða húsnæðis og skólalóðar. Þeim er ætlað að tryggja börnum með hvers kyns sérstakar þarfir hvað varðar skólagöngu, nám og/eða félagslega þátttöku sem besta þjónustu og gera almenna kennslu, sérkennslu og stuðning markvissari.

Úrræði námsvers eru hugsuð til að bæta félagslega og/eða námslega stöðu nemenda og stuðla þannig að  bættri sjálfsmynd og líðan nemenda. Þau geta m.a. falist í aðlögun námsefnis, athvarfi, stuðningi inni í bekk og utan bekkjar, sérkennslu innan bekkjar og utan eða aðlögun stundaskrár.

Ef ekki hafa fundist leiðir til að mæta sérstökum þörfum nemanda inni í almennu bekkjarstarfi í samvinnu umsjónarkennara, nemanda og foreldra hans er hægt að vísa málinu til nemendaverndarráðs og  óska eftir ráðgjöf og stuðningi starfsmanna námsvers.

Við námsverið starfa deildarstjóri, sérkennarar, þroskaþjálfi, náms- og starfsráðgjafi, stuðningsfulltrúar og sérgreinakennarar.